الجيل ده فعلا فاقد هويته ، مش عارفين هم عايزين ايه ؟و لا بيفكروا فى بكرة ؟ عايشين حياتهم بالطول و العرض ،
ساعات بأعذرهم و أقول أيامهم صعبة ، و ساعات اقارنهم بينا لما كنا فى سنهم ، أقول ما إحنا مرت علينا أيام صعبة لكن كافحنا و إتحملنا ، و الجيل ده عايز كل حاجة على الجاهز مش عايزيين يتعبوا ، عايزيين كل حاجة على الجاهز ، صحيح إحنا السبب فى جزء كبير من انانيتهم ديه لأننا وفرنالهم كل سبل الراحة علشان ما يتعبوش زينا ، و ده كان أكبر غلط وقعنا فيه ، لأنهم إعتبروا توفير كل إحتياجاتهم حق مكتسب و طبيعى ، كنا ما بنشركهمش فى مشاكلنا ،ولا نحملهم هم أى شىء، و إعتبروا ده الواجب علينا أمال خلفناهم ليه؟ على فكرة ديه جملة إبنى الكبير ..... مصطفى خريج العام الماضى و عنده الآن 25سنه ،و لسه ماإشتغلش و ادينا بنسعى ، أما إبنى الوسطانى رامى فهو فى اولى هندسة ،و كل مشاغله غير الدراسة الكمبيوتر و النت ، و الإبن الصغير فى ثانية جامعة و ده كمان كل إهتماماته النادى و الاصحاب।
أما بنتى الكبيرة متزوجة و عندها كتكوتة جميلة تمت الشهر ده سنتين ، هى كمان مشغولة بحياتها الزوجية و العملية لانها بتشتغل ، و هاجر بنتها معايا كل يوم لحد ماترجع من الشغل ،
على فكرة انا ربيتهم لوحدى، لا أم شالت معايا و لا حد و مع ذلك مشيت مشوارى وحدى و بتوفيق من ربنا فى شغلى و بيتىقدرت امشى المشوار لحد ما خرجت معاش مبكر، و علشان أنا تعبت قوى ما رضيتش بنتى تتعب زى و لا حفيدتى تروح حضانة، و الاهم من ده كله إن هاجر مالية على البيت ،
ساعات كتير الاولاد بيعاملونى بجفوة غريبةو لا بيراعوا تعبى و بتصعب على نفسى قوى ، و أسأل نفسى هوه ده جزاء تعبى معاهم و خوفى عليهم ، يا ترى أنا السبب بحنيتى الزائدة ؟؟؟
مش عارفة ؟ بأشوف نماذج لامهات عايشة حياتها و أنا كل حياتى لاولادى و زوجى و إحتياجاتهم .
أوقات كتيرة أبقى عايزة آخد راحة منهم ،لكن حتى لما ببعد عنهم بافضل مشغولة بيهم و بمسئوليتهم و إحتياجاتهم،
أنا و ابوهم ربناهم بما يرضى الله ، لكنهم اول ما كبروا إفتكروا إنهم عرفوا كل حاجة فى الدنيا ، و إحنا من زمن غير زمنهم ، أنا بالذات اللى دايما اللى بأختلف معاهم لأن والدهم شغله واخده و مش بأحب أشغلة بمشاكلهم لانه بيرجع مرهق جدا ، إلا إذا الموضوع إحتاج الى تدخل الاب لان الصبيان فعلا متعبين فى تربيتهم ،
بأدعى ربنا يقدرنا عليهم لحد ما كل واحد فيهم يشق طريقه و يقف على رجليه ، يا رب.
هناك تعليق واحد:
ربنا يخليكي لنا يا ماما و ما يحرمناش منك أبداً.
أنا أكتر واحدة حسا بتعبك لإني جربته بعد ما اتجوزت و جبت هاجر و طول الوق بقول لنفسي دا أنا كدا و ماما شايلاني أمال لو كنت لوحدي زي ما هي كانت لوحدها كنت عملت ايه؟؟
و طول الوقت ما بلاقيش رد خيالي يسمح لي بيه. بجد ربنا يخليكي ليَّ
أما بقى عن أخواتي فانتي عارفة رأيي كويس في الموضوع دا.
لازم تسيبيهم يتحملوا مسئولياتهم و كل واحد أدرى بنفسه. يعني ما ترتبيش أوضهم و ما تغسليش الأطباق و الأكواب اللي بيستخدموها كل واحد فيهم يتحمل مسئوليته ما تلفيش في أوضهم و دواليبهم على الهدوم اللي عايزة تتغسل اللي ما يجيبلكيش غسيله يقعد من غير هدوم نظيفة.
دي حاجات كلها بسيطة بس لو شلتي عبئها من عليكي هيفضى عندك وقت كبير تقدري ترتاحي فيه و تستجمي و تعملي حاجات نفسك تعمليها و مش لاقيالها وقت و لا مجهود زي انك تنزلي تمشي كل يوم و لو نصف ساعة.
حاجة تانية لازم تسيبيهم يعتمدوا على نفسهم فيها لان أنا عانيت منها لما اتجوزت و هي مسئولية تحمل توجيه صرف فلوسهم.
يعني المصروف ما يبقاش باليوم و مش كل ما يطلبوا فلوس ياخدوها انتي و بابا اتفقوا على ميزانية لكل واحد فيهم بالأسبوع ياخدها و مالكوش دعوة لا بتصوير مذكرات طالما اشتريتم الكتب و لا بمواصلات و لا بخروج و لا برحلات و لا بأي حاجة يتقال لهم هي دي ميزانيتك لكل حاجة للأسبوع دا تصرفها في يوم في أسبوع في اثنين انت حر مفيش غيرها تاني و لو الدنيا اتقلبت.
حتى ميزانية شراء اللبس و الأحذية و الكلام دا هتقولوا لهم دي الميزانية المخصصة لك للفترة دي على أول الدراسة مثلاً و لا على العيد و لا الشتاء و لا أي وقتٍ كان تجيب بيها حاجة واحدة تجيب بيها عشر حاجات تطلع خامتها كويسة و تعيش تطلع خامتها وحشة و تترمي بعد لبسة هم أحرار هو دا الموجود و مفيش غيره.
تعرفي دا هيعلمهم ينقوا الحاجة الكويسة و ما يجيبوش غير اللي هم محتاجينه و هيبطلوا سفه في الصرف
لازم يا ماما تعملي كدا و في أقرب وقت لانهم كبروا خلاص و دا كان لازم يتعلموه من بدري و كل ما بتعفيهم من تحمل المسئوليات دي كل ما بيتعبوكي أكتر و بيخيبوا أكتر صدقيني دا لمصلحتهم قبل ما يكون لراحتك
إرسال تعليق